حوزہ نیوز ایجنسی کی رپورٹ کے مطابق، ایران کے قومی نشریاتی ادارے کے نائب سربراہ احمد پہلوانیان نے قرآن کریم کے ممتاز اساتذہ کے ایک اجلاس سے خطاب کرتے ہوئے کہا کہ قرآن کی تعلیم و ترویج کے لیے تمام اداروں کو مل کر کام کرنا ہوگا۔ انہوں نے کہا کہ قرآن کریم کے 10 ملین (1 کروڑ ) حافظ تیار کرنے کے ہدف کو پورا کرنے کے لیے تمام دستیاب صلاحیتوں سے بھرپور فائدہ اٹھانا ضروری ہے۔
احمد پہلوانیان نے کہا کہ ریڈیو قرآن کو صرف پروگرام نشر کرنے والا ذریعہ نہیں بلکہ قرآن کے فروغ اور تعلیم میں ایک فعال اور مؤثر ادارے کے طور پر اپنا کردار ادا کرنا چاہیے۔ اس مقصد کے لیے مؤثر مواد تیار کرنے، قرآنی سرگرمیوں کو معاشرے میں فروغ دینے اور قرآن کریم کے ممتاز اساتذہ و ماہرین کی صلاحیتوں سے فائدہ اٹھانے کی ضرورت ہے۔
انہوں نے کہا کہ ریڈیو قرآن کے لیے ایک مشاورتی کونسل قائم کی جانی چاہیے جس میں ممتاز قرآنی اساتذہ اور ماہرین شامل ہوں، تاکہ ان کی تجاویز کی روشنی میں اس نشریاتی ادارے کے مستقبل کی بہتر منصوبہ بندی کی جا سکے۔
پہلوانیان نے ریڈیو قرآن، ریڈیو ترتیل اور ریڈیو تلاوت جیسے خصوصی قرآنی ذرائع کو مزید مضبوط بنانے پر بھی زور دیا اور کہا کہ جدید ٹیکنالوجی اور بدلتے ہوئے ذرائع ابلاغ کو مدنظر رکھتے ہوئے روایتی طریقوں سے آگے بڑھنا ہوگا۔
انہوں نے کہا کہ قرآن کے فروغ کے لیے کام کرنے والے تمام اداروں کو باہمی تعاون کے ساتھ آگے بڑھنا چاہیے اور ریڈیو قرآن ان اداروں کے درمیان تعاون کا مرکز بن سکتا ہے۔
آخر میں انہوں نے ایک کروڑ حافظ قرآن تیار کرنے کے منصوبے پر زور دیتے ہوئے کہا کہ اس مقصد کے لیے تمام اداروں کو اپنی صلاحیتیں بروئے کار لانی چاہئیں اور ریڈیو قرآن کو مؤثر مواد، میڈیا کے ذریعے آگاہی اور قرآنی ماہرین کی مدد سے اس مہم میں قائدانہ کردار ادا کرنا چاہیے۔
آپ کا تبصرہ